کمسن بچیوں کے ساتھ زیادتی اور قتل جیسے واقعات بیمار معاشرے کا عکاس ہیں، ہارون بشیر بلور

پشاور ( پ ر ) عوامی نیشنل پارٹی کے صوبائی ترجمان ہارون بشیر بلور نے مردان میں معصوم کمسن آسما سے جنسی زیادتی اور قتل کی شدید الفاظ میں مذمت کرتے ہوئے کہا ہے کہ پختون معاشرے میں اس قسم کے واقعات افسوسناک ہیں ،صوبائی حکومت کی جانب سے مکمل خاموشی سے ظاہر ہوتا ہے کہ یہ انسانیت سوز واقعات حکومت کیلئے کوئی اہمیت نہیں رکھتے ،اپنے ایک بیان میں انہوں نے کہا کہ قصور میں ہونے والے زینب کا واقعے پر ہر آنکھ پُرنم ہے تاہم آسماء بھی ہماری بچی تھی اور دونوں کو انصاف ملنا ضروری ہے ، انہوں نے کہا کہ ملک میں کمسن بچیوں کے ساتھ زیادتی اور قتل جیسے واقعات بیمار معاشرے کا عکاس ہیں ، صوبائی حکومت مردان میں ہونے والے واقعے پر خاموش تماشائی بنی بیٹھی ہے اور پوسٹ مارٹم رپورٹ آنے کے بعد بھی حکومتی ایوانوں میں کوئی جنبش نظر نہ آئی ، ہارون بشیر بلور نے کہا کہ مجرموں کو جلد از جلد گرفتا کر کے قرار واقعی سزا دی جائے تو مستقبل میں بچوں کی زندگیاں بچائی جا سکتی ہیں ، انہوں نے اس بات پر افسوس کا اظہار کیا کہ پی ٹی آئی کا تمام تر بیانیہ تاحال زینب تک محدود ہے،جو اس بات کی جانب واضح اشارہ ہے کہ عمران خان کو اصل لگاؤ پنجاب کے ووٹ بنک سے ہے ، انہوں نے کہا عدالت آسما کیس میں بھی سوموٹو ایکشن لے اور ملزمان کو انصاف کے کٹہرے میں لا کر متاثرین کو انصاف دیا جائے۔