اے این پی کی منشور کمیٹی کا اجلاس ، انتخابی منشور کیلئے موصول تجاویز کا جائزہ

پشاور ( پ ر ) عوامی نیشنل پارٹی کی منشور کمیٹی کا اجلاس کمیٹی کے چیئرمین میاں افتخار حسین کی زیر صدارت باچا خان مرکز میں منعقد ہوا ، اجلاس میں 2018کے الیکشن کیلئے ملک بھر سے موصول ہونے والی تجاویز کا جائزہ لیا گیا ، اس موقع پر منشور کمیٹی کے سیکرٹری سردار حسین بابک ، بشریٰ گوہر ، افراسیاب خٹک اور صوبائی ڈپٹی جنرل سیکرٹری ایمل ولی خان بھی موجود تھے، اجلاس میں تمام مکتبہ فکر کے لوگوں ، تمام صوبوں اور پارٹی کی ذیلی تنظیموں کی جانب سے انتخابی منشور کی تیاری کیلئے بھیجی گئی سفارشات اور تجاویز کا تفصیلی جائزہ لیا گیا، کمیٹی چیئرمین میاں افتخار حسین نے اس اہم کاوش اور دلچسپی پر تمام افراد اور تنظیموں کا شکریہ ادا کیا اور انہیں شاندار الفاظ میں خراج تحسین پیش کیا،انہوں نے کہا کہ کمیٹی موصول شدہ تجاویز کی سکروٹنی کرے گی اور اس دوران مزید تجاویز کا بھی خیر مقدم کیا جائے گا، انہوں نے کہا کہ کمیٹی کا آئندہ اجلاس اب 7اگست2017کو دن 11بجے باچا خان مرکز میں منعقد ہوگا اور اس حوالے سے مزید آنے والی تجاویز کا بھی جائزہ لیا جائے گا۔